Батайги Дагъистан дур билараб кечI باتايڬێ داغێستان دۇر بێلاراب كېڃ.

٢٠١٥  سۈناڷۇل باقعېدۇڶ مۈڞاڷۇل ١٨ قۈ،  هۈرڨۈ قۈ - خامێز قۈ

باتايڬێ داغێستان دۇر بێلاراب كېڃ.

١.

زاماناڷۇل هۈكۈ،  ڸالڅې ښۈ داهاڷ

دێيې بۈڨۇن بۇڬۈ غۈرڨې رېۺطێنې.

دۇر ڃامۇڃاب قێرێ،  ڃۈبۈڬۈياب كېڃ

ڃالعانا عاڬاراب،  عايێب هابۇڬې.

عازێزاب داغێستان،  بارۺانا مۇنڬۇن،

بۈرجێن دۇڛا تېدال،  تانا مۇن راگاڷ.

تانا قۇنقراباڛا خاسلێل زۈب عادێن،

زاغالاب ځېراب غوېط،  طانځاڛا عادێن.

دۇر گێيێدې بێڨێ،  گێهۇمېرچێڸێ،

گۈلېب هېڃۈ دێدا طۈگاڷ حېڮېزې.

دۇر حاكێمزابازې حېلحېلچاعاڛا

ڨابۇلېل څاتاڛا څارصۇن بۇڬۈ راگ.

دۇيې كېرېن راهۇن،  كۇڃدۇل احانا،

ئۇمۇمۇزۇل نۇځال رېخۇن تۈڬېيان.

دۇدا دۇن وێڮێڃۈ،  دێر كېڃ راعێڃۈ،

رۈڮ بۇڬۈ ڞۈهازۇل نێڶېدا هۈرڨۈب.

ساياڅاب ڬاڬۇياڷ ځۈنۈ كێنێڬێ،

رېخانا دۇڛا دۇن چێيار بۇسادې.

دێدا بێڄۇلارېب،  دۇن وێڄۇلارېب،

دۇنيالڬۇن قېرڨانا، - قۇنا اخێرڬێ.

حابۇرغاراب زامان،  ڸالێۺ عېمېرال

عۈدۈرې رېۺطانا دۇر هاكێداصا.

مۇن جێندێر ڬۇرێلان انا راسۇلڬێ،

جۇندۇلڬۇن قېرڨېزې قۇوات عېڃېڷۇل.

هېلڬۈ جۇندۇل رۇڬۈ جېڬێ دۇر تاخ ڭۇن،

جال خێسێزې گۈلېل رێجۇن هېڃێلان.

دۈلڬۈ باڝال رۇڬۈ نێزام «ڝۇنۇلېل»،

ڝێيال څۇلۇڅازدې خێس - خێسۇن طامۇن.

دۈبڬۈ ماعۇ بۇڬۈ،  دۈبڬۈ بێ بۇڬۈ،

بېتۇن دۇر مۇعرۇزۇل كاراندا جېڬێ.

دۈبڬۈ څانطێ بۇڬۈ څاراوۇلزاباز،

قارقالابێ ڝۇنۇن ڞۈهۈد ڮوادۇلېب.

الجان ۺوايڬێيێلان هارۇلېب بۇڬۈ

هانێب دێر خالقاڷې جۇجاح راهاراز.

دێناڷۇل واڛازدا گۈچۈن تۇن بۇڬۈ

ئێمامڬێ ئێمانڬێ ښاداڅ باچێنې،

هېڃۈ دۈب شێعرۇڬێ شاعێرزابێڬێ،

ۺۇۺان رۇڬۈ جاقا دێر قالامښۈيال.

هېڃۈ هېزۇل ښۈڸێ،  هېڃۈ بۈرخاڸێ،

هېب راسۇلڬۇن اراب بۇصێنڃۈ ناڅې.

٢.

رۇگانا،  گۈچېنڃۈ،  ارال دۈل قۈيال

قێسمات گێيازۇلڬۈ ښۈښۈڷ جۇبارال.

ښۈ - ښاڛا ځێنڸۇلېل،  ښۈ - ښاز عۇڞۇلېل

كۈڃۈل قێمات بۇڬېل،  قاصدال راڞادال.

رۇگانا عادامال،  بۇگانا عۇمرۇ،

عادانڸێ ڝۇنارال ڞوابزاز ڬوانغاراب.

رۇگانا رۈسابێ،  ياساز خارښێڛا،

خارێدا فاندۇر څوان احۇلېل كۇڃدۇل.

كێنابڬۈ بێلانا،  بۇحانا،  ڃوانا

ڃوادارۇڅابازې قۇلانا بېطېر.

بۈرجۇنېب ۺێنالدې بانا عارادا

عێصێنڸێ بۈسانا،  بۈرخاڸێ بێچۇن.

ۺێب جۈ ښۈ دێر ئۇهدێ،  ۺێب جۈ ښۈ دێر كېڃ 

كاراچېلاباڷې طێنگۇلېب ماعۇ.

مۇعرۇزدا خۇطاراب ئێنصۇل رۈسۈڶې

ڶۇتۇلېل خێيالاڷ ځۇرخارال نۇځال.

دۇن غۈرڨې رېۺطێنا،  مۇن ڛېبېخۇن ا،

ڛێدالاب،  حێنقاراب،  قابێحاب زامان.

دۇيې زانێ ڃواراب زامان باڃانێ،

واڃێنا طاد وۇصۇن،  ڃاڬۈ خۇطانێ.

ئۈه،  عازداڶ خۇطاراب،  خێرێياب طاڸێ

طاد بۇصايڬێ دۇڅې ئێځڬێ ځێنڸێڬێ.

ځێسۇن وۇڬۈ بېطېر،  باتايڬێ هېصدا

دۇر بێلاراب كېڃڬێ،  بۈرتاراب ڞواڬێ.

كېڃ څوانا داوۇدێلازۇل حابێبێڛا.

Батайги Дагъистан дур билараб кечI.

1.

Заманалълъул гьоко, лъалхъе цо дагьалълъ

Дие бокьун буго гъоркье рещтIине.

Дур чIамучIаб къири, чIобогояб кечI

ЧIалгIана гIагараб, гIайиб гьабуге.

ГIазизаб Дагъистан, барщана мунгун,

Боржин дуца тедал, тана мун ракIалълъ.

Тана къункърабацца хаслил зоб гIадин,

Загъалаб хераб гъветI, тIанхацца гIадин.

Дур кIийиде бикьи, кIигьумерчилъи,

КIолеб гьечIо дида тIокIалълъ хIехьезе.

Дур хIакимзабазе хIелхIелчагIацца

Кьабулел хъатацца хъарссун буго ракI.

Дуе керен рагьун, кучIдул ахIана,

Умумузул нухал реххун тогеян.

Дуда дун вихьичIо, дир кечI рагIичIо,

Рохь буго цIцIогьазул нилIеда гьоркьоб.

Саяхъаб гагуялълъ хоно киниги,

Реххана дуцца дун чияр бусаде.

Дида бичIчIулареб, дун вичIчIулареб,

Дунялгун къеркьана, къуна аххирги.

ХIабургъараб заман, лъалиш гIемерал

ГIодоре рещтIана дур гьакидасса.

Мун жиндир гурилан ана Расулги,

Жундулгун къеркьезе къуват гIечIелълъул.

Гьелго жундул руго жеги дур тахх ккун,

Жал хисизе кIолел рижун гьечIилан.

Долго бацIал руго низам «цIунулел»,

ЦIиял хъулухъазде хис-хисун тIамун.

Добго магIу буго, добго би буго,

Бетун дур мугIрузул каранда жеги.

Добго хъантIи буго хъаравулзабаз,

Къаркъалаби цIунун цIцIогьод хьвадулеб

.

Алжан щвайгийилан гьарулеб буго

Гьаниб дир ххалкъалълъе жужахI рагьараз.

Диналълъул ваццазда кIочон тун буго

Имамги иманги цадахъ бачине,

ГьечIо доб шигIруги шагIирзабиги,

Щущан руго жакъа дир къаламцоял.

ГьечIо гьезул цолъи, гьечIо борххалъи,

Гьеб Расулгун араб буссинчIо нахъе.

2.

РукIана, кIоченчIо, арал дол къоял

Къисмат кIиязулго цоцалълъ жубарал.

Цо-цацца хинлъулел, цо-цаз гIуцIцIулел

КочIол къимат бугел, къассдал рацIцIадал.

РукIана гIадамал, букIана гIумру,

ГIаданлъи цIунарал цIцIвабзаз гвангъараб.

РукIана росаби, ясаз ххарцицца,

Ххарида пандур хъван ахIулел кучIдул.

Кинабго билана, бухIана, чIвана

ЧIвадарухъабазе къулана бетIер.

Боржунеб щиналде бана гIарада

ГIиссинлъи босана, борххалъи бичун.

Щиб жо цо дир угьди, щиб жо цо дир кечI -

Карачелабалълъе тIинкIулеб магIу.

МугIрузда ххутIараб инссул росулIе

ЛIутулел ххиялалълъ ххурххарал нухал.

Дун гъоркье рещтIина, мун ццебеххун а,

Ццидалаб, хIинкъараб, къабихIаб заман.

Дуе зани чIвараб заман бачIани,

ВачIина тIадвуссун, чIаго ххутIани.

Огь, гIаздалI ххутIараб, ххирияб тIалъи

ТIад буссайги духъе ихги хинлъиги.

Хисун вуго бетIер, батайги гьессда

Дур билараб кечIги, бортараб цIцIваги!

2015 соналълъул бакъгIедулI моцIцIалълъул 18 къо, гьоркьо къо - ххамиз къо

КечI хъвана Давудилазул ХIабибицца.