ЦЦЕВЕХЪАН РАЖБАДИНИЛ КЕЧI ڛېوېڅان راجبادێنێل كېڃ

٢٠١٥ سۈناڷۇل رېڨارۇڶ مۈڞاڷۇل ١٨ قۈ،  انڷځۇر قۈ - ئێتنێ قۈ

ڛېوېڅان راجبادێنێل كېڃ

نۇغايالدا رێۺۇن،  چۇيالڬێ رېگۇن،

چېرڬېسالدا رێۺۇن،  طاد ڨالالڬێ ڸۇن،

غابارتێ بۇرتابێ ناڅاڬێ رۇڮۇن،

ڞان رێڮۇن خوالچابێ چارخێداڬێ ڭۇن،

ڨواهۇن رێڮۇن څێرمال څاتێڨېڬێ ڭۇن،

ڨابۇن رێڮۇن خۇنجرۇل راچلێڅڬێ رۈرچۇن،

ښۈ ماعارۇلازۇل هێطێناب قۈقا

قاڃانا ڞۈرالدې،  څێزێڅالدې.

څێزێڅازۇل بۈڞۇل داولا هابێزې،

تاواتێ مۇسۇدۇل اسێر هارێزې.

قۈقادۇل بېطېرڬێ رېقاو راجبادێن،

رۈڮازدا ڮوادۇلېب غالباڝ عادێناو.

جانێب ڞۈرالدې ۺۇن ۺۇڬۈ قۈيالدې

ڞۈر باڨۇڶې گانڝۇن،  داولاڬێ بۈسۇن،

بۇطرۇل مېسېدێلاب كێلێسا بۇحۇن،

كافۇر څێزێڅازۇل رۇقزالڬێ طۇطۇن،

ڷۇردۇزدا ناط بۇڬېل ئۈښالڬێ راچۇن،

غالال مېسېدێلال ياسالڬێ څامۇن،

مێڅازدا حۇر ڃوارال واسالڬێ ڃواڃوان،

كامێلاب داولاڬێن،  داهاب قۈقاڬۇن،

قوارێدال نۇځازدې ناڅرۇصۇن ۺوېدال،

نۇځال ڭۇن راتانا څاراوۇلزابێ.

  نێج ئېبېل - ئێنصۇيې ښۈ - ښۈيێن رۇڬېل،

سۇڅماڅال رېخۇن تې،  ازناوۇرزابێ.

راچارال ڷۇدبۇزې ښۈڬێ هېڃێلان.

………………

  نۇج ئېبېل - ئێنصۇيې ښۈ - ښۈ راتانێ،

باڨۇڶاڬێ قۈطۇن،  گێ - گێ هارێلا.

راچارال ڷۇدبۇزې ښۈڬێ راتڃۈنێ،

بۇطرۇل طاصا قۈطۇن،  قارقالا بێطلا.

هېب گێيابڬۈ راعێ گالاڷـڬێ ابۇن،

ڨواهدېزې رېگانا حامۇل څێزێڅال.

خۇنجرۇڛا عۇرۇ صۇن،  صانڬارال هارۇن،

راغدا بايبێڮانا ماعارۇلاڛا.

خايبار څالايالدا عالێ  كێنێڬێ،

راجبادێنڬێ ڄانا صانڬارالدا ناڅ.

غالباڝێدا ښاداڅ رۇزێل طێنڃ عاداو

جێندێرڬۈ واڛاصدې امرۇ هابۇنا،

رېگايان دێر چۈدا،  ا مۇن غۈلۈدې.

ڃاحێيال ۺێنازدا هێقارێ هابې،

عێصێنال ۺێنازدا دێر سالام بێښې،

دۇنڬێ تانێن ابې اهاب حالالدا،

حالايې نۇج ۺوانێ،  شۇكرۇ بۇڬێلان.

ڸابڬۈ قۈيێل نۇځاڷ جانێب ڞۈرالدې،

قاڸێلالدې ۺوانا ۺێنگێل څاحاب چۇ.

 سالام عالايكۇم،  جان هۈلۈدێصېل.

  وا عالايكۇم سالام،  راجبادێنێل واڛ.

ڬۇلا ابخۇنارېو،  خېر رېهالارېو،

خوالچېن چۇچۇلارېو،  چۇ صواكالارېو،

ڬۇلايێۺ ابخاراب،  خېرێۺ رېهاراب،

خوالچېنێۺ چۇچاراب،  چۇيێۺ صواكاراب،

خېخاب احۇد ۺوېزې ۺێب نۇجېي ڭاراب؟

ڬۇلاڬێ ابخێنڃۈ،  خېرڬێ رېهاڃۈ،

خوالچېنڬێ چۇچێڃۈ،  چۇڬێ صواكاڃۈ،

صوېرۇڅ څازاڅ ڶۇهۇن تانا راجبادێن،

مېتېر قاڸێلالدې قۈقا ۺوايێلان،

ۺواراو دۇن نۇجېڅې،  جان غۈلۈدێصېل.

ماجڬێت طۈځدې واځۇن چاوۇش احدانا،

احێ بان رۈسۇڶې واسال تێرانا.

چۇ - ياراغ ڷێگال چێ،  ڷۇدبێ ڝاقال چێ

هېب قۈياڷ قاڸۇدا قواطێر راڅانا.

مېتېر رادالێصا باق - ڝا بۈرڨێزې

راغدا ۺوېلێن ابۇن،  نێڬاتڬێ هابۇن.

عۇردا كېرېنڬێ ڛۇن،  كوېراڷ څێرێم ڭۇن،

تۇمانگۇل گالازدا ڴۇي - ڝاڬێ بېتۇن،

راغۇلېل رۇگانا راجبادێن قۈقا.

كێنداي،  ۺێبدايێلان وۈرخۇن بالاهداي،

باڃۇلا بێڮۇلا ۺێنگێل څاحاب چۇ،

هۈرۈڛا څامۇراب طاماځ كێنێڬێ،

طاد رېگاراو وۇڬۈ دێرڬۈ طێناو واڛ.

هالاكاب ڞاد بايدال ۺواراب عۈر عادێن،

طادې ۺۈلېب بۇڬۈ باڃۇنېب احێ.

 سالام عالايكۇم،  رېقاو راجبادێن،

قوارێدێۺ هارۇرال هال څێۇێڅاز نۇج؟

رېۺطێن هابێڃۈڬۈ،  صواك چۇچێڃۈڬۈ،

چارامال خوالچابێ قواطێرې ڞانا.

قۈقال تۇمانگازۇل ڨواهێ باڅانا،

عێياڷې گانڝۇلېل باڝال كێنێڬێ،

غۈرڶې جۇران انا هېل غۈلۈدێصېل.

هېرېگلێ خاناصۇل څاحێلاب چادێر

چۈل مالاڨ مېرڮانا هێطێناو واڛاص.

چادێرالدا جانێر څێۇێڅ څازاڅال

خوالچاڛا غۇرانا غۈلۈدێصېڛا.

طادې ۺواراب احۇل كۇتاك بێڮێدال،

هېل غۈلۈدێصېزۇل هۇنار بێڮێدال،

ياراغ عۈدۈب رېخۇن،  رېطېل عۈدۈب بان،

ڶۇتێزې رېگانا تۇشازۇل قۈقا،

عۈدێزې رېگانا څێزێڅازۇل بۈ.

هېل ازناوۇرزاباز امان هارانا،

تاواتێ خانزاباز خوالچابێ ڨۇنا،

خواصار تېيان ابۇن هاب نۇځالدا نێج.

داولا عېڃېڷۇبې طادې رېخێزې

طاصا باڅۇن رېطېل ښاداڅ بۈسانا.

كۇمېك قوارېعانێ،  حالايې ڄېزې

حاما څێۇێڅالڬێ ڛېرې قۈطانا.

بېرښێناب ڞار بۈسۇن،  ڷێگاب داولا ۺۇن،

دۈل غۈلۈدێصېلڬێ ناڅ رۇصۇن انا.

بێچاصۇل تالێحاڷ تۇشبابێڬێ قۇن،

بېر عۈرڞاراب داولا ښاداڅڬێ بۈسۇن،

ماعارۇل قۈقاڬێ رۈقۈب بۇصانا،

رېقاو راجبادێنڬێ راگ بۈخۇن ۺوانا.

هېدێ - هېدێنالڬێ طاعێندال ڬۇرێۺ

طاعاياب هاب عۇرۇس عېمېرڸۇن ڭاراب.

گۇدێ - گۇدێيالڬێ ځۇن ئێندال ڬۇرێۺ

هاب داغێستانالدا كوېرۺېل باتاراب.

گال هێقۇن راغۇلېل ڶۇعێدال ڬۇرێۺ

غۇنێب مېعېرالدا څالا صۈڴاراب؟

ЦЦЕВЕХЪАН РАЖБАДИНИЛ КЕЧI

Нугъаялда рищун, чуялги рекIун,

Чергесалда рищун, тIад кьалалги лъун,

Гъабарти буртаби нахъаги рухьун,

ЦIцIан рихьун ххвалчаби чарххидаги ккун,

Кьвагьун рихьун хъирмал хъатикьеги ккун,

Кьабун рихьун ххунжрул рачлихъги рорчун,

Цо магIарулазул гьитIинаб къокъа

КъачIана ЦIцIоралде, Гуржистаналде.

Гуржиязул боцIцIул давла гьабизе,

Тавати мусудул асир гьаризе.

Къокъадул бетIерги Рекъав Ражбадин,

Рохьазда хьвадулеб гъалбацI гIадинав.

Жаниб ЦIцIоралде щун щуго къоялде

ЦIцIор бакьулIе кIанцIун, давлаги босун,

БутIрул меседилаб килиса бухIун,

Капур гуржиязул рукъзалги тIутIун,

Лълъурдузда натI бугел оцалги рачун,

Гъалал меседилал ясалги хъамун,

Михъазда хIур чIварал васалги чIвачIван,

Камилаб давлагин, дагьаб къокъагун,

Къваридал нухазде нахъруссун щведал,

Нухал ккун ратана хъаравулзаби.

– Ниж эбел-инссуе цо-цойин ругел,

Сухъмахъал реххун те, азнавурзаби!

Рачарал лълъудбузе цоги гьечIилан.

……………………………………….

– Нуж эбел-инссуе цо-цо ратани,

БакьулIаги къотIун, кIи-кIи гьарила.

Рачарал лълъудбузе цоги ратчIони,

БутIрул тIасса къотIун, къаркъала битIла.

Гьеб кIиябго рагIи кIалалъги абун,

Кьвагьедезе рекIана хIамул гуржиял.

Ххунжруцца гIуру ссун, ссангарал гьарун,

Рагъда байбихьана магIарулацца.

Ххайбар хъалаялда ГIали  киниги,

Ражбадинги чIчIана ссангаралда нахъ.

ГъалбацIида цадахъ рузил тIинчI гIадав

Жиндирго ваццассде амру гьабуна,

РекIаян дир чода, а мун Гъолоде.

ЧIахIиял щиназда гьикъари гьабе,

ГIиссинал щиназда дир салам бице,

Дунги танин абе агьаб хIалалда,

ХIалае нуж щвани, щукру бугилан.

Лъабго къойил нухалълъ жаниб ЦIцIоралде,

Къалъилалде щвана щинкIил хъахIаб чу.

– Ассалам гIалайкум, жан гъолодиссел!

– Ва гIалайкум салам, Ражбадиил вацц!

Гула абхунарев, ххер регьаларев,

Ххвалчен чучуларев, чу ссвакаларев,

Гулайищ абхараб, ххерищ регьараб,

Ххвалченищ чучараб, чуйищ ссвакараб,

Ххеххаб ахIуд щвезе щиб нужей ккараб?

Гулаги абхинчIо, ххерги регьачIо,

Ххвалченги чучичIо, чуги ссвакачIо,

Ссверухъ хъазахъ лIугьун тана Ражбадин,

Метер къалъилалде къокъа щвайилан,

Щварав дун нужехъе, жан гъолодиссел.

Мажгит тIохде вахун чавуш ахIдана,

АхIи бан росулIе васал тирана.

Чу-ярагъ лълъикIал чи, лълъудби цIакъал чи

Гьеб къоялълъ къалъуда къватIир рахъана.

Метер радалисса бакъ-цIа боркьизе

Рагъда щвелин абун, нигатги гьабун.

ГIурда керенги ццун, квералълъ хъирим ккун,

ТуманкIул кIалазда кIкIуй-цIаги бетун,

Рагъулел рукIана Ражбадин къокъа.

Киндай, щибдайилан ворххун балагьдай,

БачIула бихьула щинкIил хъахIаб чу,

Гьороцца хъамураб тIамах киниги,

ТIад рекIарав вуго дирго тIинав вацц.

Гьалакаб цIцIад байдал щвараб гIор гIадин,

ТIаде щолеб буго бачIунеб ахIи!

– Ассалам гIалайкум, Рекъав Ражбадин,

Къваридищ гьарурал гьал гуржияз нуж?

РештIин гьабичIого, ссвак чучичIого,

Чарамал ххвалчаби къватIире цIцIана.

Къокъал туманкIазул кьвагьи бахъана,

ГIиялълъе кIанцIулел бацIал киниги,

ГъорлIе журан ана гьел гъолодиссел.

ГьерекIли ханассул хъахIилаб чадир

Чол малакь мерхьана гьитIинав ваццасс.

Чадиралда жанир гуржи хъазахъал

Ххвалчацца гъурана гъолодиссецца.

ТIаде щвараб ахIул кутак бихьидал,

Гьел гъолодиссезул гьунар бихьидал,

Ярагъ гIодоб реххун, ретIел гIодоб бан,

ЛIутизе рекIана тушазул къокъа,

ГIодизе рекIана гуржиязул бо.

Гьел азнавурзабаз аман гьарана,

Тавати ханзабаз ххвалчаби кьуна,

Хвассар теян абун гьаб нухалда ниж.

Давла гIечIелълъубе тIаде реххизе

ТIасса бахъун ретIел цадахъ босана.

Кумек къварегIани, хIалае чIчIезе

ХIама гуржиялги ццере къотIана.

Берцинаб цIцIар босун, лълъикIаб давла щун,

Дол гъолодисселги нахъ руссун ана.

Бичассул талихIалълъ тушбабиги къун,

Бер гIорцIцIараб давла цадахъги босун,

МагIарул къокъаги рокъоб буссана,

Рекъав Ражбадинги ракI боххун щвана!

Гьеди-гьединалги тIагIиндал гурищ

ТIагIаяб гьаб гIурус гIемерлъун ккараб.

КIуди-кIудиялги хун индал гурищ

Гьаб Дагъистаналда кверщел батараб.

КIал гьикъун рагъулел лIугIидал гурищ

Гъуниб мегIералда хъала ссокIкIараб?