АХIУЛ ГОХIИЛ КЪИССА احۇل ڬۈحێل قێصا

۲۰۱۷ سۈناڷۇل راڿارۇڶ مۈڞاڷۇل ۱۰ قۈ، عۇلجۇم قۈ - رۇزمان قۈ

احۇل ڬۈحێل قێصا

خالقێياب كېڃ

راغۇل قۇوات داهڸێدال،  رۈسابێ چۇچۇن ڭېدال،

چارا ځواراو ئێماماص عاشێلطې نۇځ باڅانا.

راغۇل تاواڭال بۇڬېب،  غازاواتاڷۇل اهلۇ،

عېشدېرێل جاماعاتڬۇن،  عاقلۇ داندبازې انا.

حالبێڮارال مۇرێدال،  ڛېبېڅاناب جاماعات - 

ئێماماصۇل واعزاياڷ اسێر هارۇن رۇگانا.

احۇل ڬۈح ۺۇلا ڭوېلێن شامێل ئێمام گاڸانا،

ۺۇلاڸۇل ڬۈحدا ڄېلێن،  مالاچێڬێ واڅانا.

گێيابڬۈ ڬۈح ڝۇنێزې مۇرێدزابێ رێڨانا،

مالاچێل قافێلادۇڶ ۺۇنۇسڬۈعان چێ ڭانا.

شامێلێل مۇرێدزابێ ازارێڶان رۇگانا،

ڄۇجۇ،  ڸێمالڬێن ځېرال،  نۇخ هېڃېب ڬۈحدې انا.

ئێمام راغۇڅابێڬۇن احۇل ڬۈحدې واځانا،

راغۇي حادۇرڸۇن رۇڬېل ۺۇلاڸابێ رێڮانا.

ۺێباب ۺۇلاڸێيالدې رېقۈن ڭۈلېل طامۇنا،

عېشدېرێل ڬۈح ڝۇنێزې انڝڬۈ مۇرێد وێطانا.

كێنابڬۈ حالطێ طۇبان،  حالڮێ چېرخاڷې هابۇن،

ڬۈحێل طۈهێوڬێ واځۇن،  ئێمام عۈدۈوڄۇن وۇڬۈ.

كێنالڬۈ مۇرێدزابێ،   صوېرۇن ئێمامڬێ ڭۇن،

غازاوات هابێلێلان،  هېدۇن،  گاڸالېل رۇڬۈ.

باحارچێڸێ كامێلاب كێنابڬۈ هالماغڸێڬۇن

عامێرځانێل مالاچێ بۈرخاڸۇدې واځانا.

هېدێناب حێسابالدا ڬۈحال ۺۇلا هارۇنا،

راڅ - راڅالداصان راڃۇن،  كافۇراز صوېرۇن ڭۇنا.

شامێلێل مۇرێد رێڴۇن،  انڝڬۈ - قۈڬۈ چێ ڭۈلېب

قۇواتڬێ ښاداڅ باچۇن،  ساردار عاشێلطې ۺوانا.

ۺێبڬۈ زارار ڭېڃۈڬۈ،  شامێل كوېردې وۈسێلێن،

هاب باگالداڬۈ راغۇل اخێر بۇگێنې بۇڬێن.

رېگېڶ فاخرۇڸێڬێ ڭۇن،  ۺۇلێياب نێڬاتالدا

راغدا غۈرڷې ڶۇهێنې امرابێ ڨۈلېو وۇڬۈ.

كێنابڬۈ راڅالداصان راغێزې بايبێڮانا،

راغۇل ايات رېۺطارال صۈنڬرۈدا ناڅا ڄانا.

داهالڬۈ مۇرێدزابێ بېرزۇيېڬۈ عېڃۈڬۈ،  

عۇرۇسازۇل كاماندێر كېف ۺۇن،  وېڷۇلېو وۇڬۈ.

وۈرې،  مالعۇن،  وېڷۇڬې،  ناڅا عۈدێزې ڭېلێن،

عێيال رېڅابازداصا څۇمۇر حێنقۇلارېبێن.

سالدات عېمېراب بۇڬێن،  مۇن ئېلداصا ڃۇحۇڬې،

ڃوان عۈدۈرې ئېل رايدال،  خادۇو عۈدێزې ڬۇرێن.

باچۇنېب ناقێراڬۇن،  بۇخۇلاڬۈ قالێڬۇن،

عۇرۇسازۇل كاماندا ڬۈح - ۺۈبازدا ۺۇۺانا.

احۇل ڬۈحدې راځۇنېل عۇرۇسازۇل سالداتال،

شامێلێل چێ ځوېڃۈڬۈ،  غۇرۇن ڴالاڅې رانا.

ۺۇلاڸۇل ڬۈحدې اراب ڬېنېرالاصۇل فۈلكڬێ،

حال صوارال عێيال عادێن،  ڬۈحێل باقدا ۺافانا.

غۇرۇن عۈدۈر ران رۇڬېل راغۇڅابێ رێڮێدال،

ساردار هاڬاو چێ عادێن،  صوېردانڅێزې ڶۇهانا.

هېب حێسابالدا واغۇن،  بېرهۇنارېبڸێ ڸايدال،

كێناونێڬێ كاماندێر داندې احۇن،  گاڸانا:

ڬېنېرالاصۇل امرۇ طۇبازې ڭۈلێن ابۇن،

كێنالڬۈ نۇسێلبۇطرۇز طادېبۈسێ هابۇنا.

گێڬۈ مۈڞاڷ راغێدال،  شامێلێل مۇرێدازۇل

كافۇرزاباز غۇرارال داهال چاعێ رۇگانا.

شامێلێل مۇرێدزاباز ڬېنېرالاصۇل سالدات،

رېگېي بۈڨۇڅې غۇرۇن،  ۺۈبال،  ڴالال ڝۇن رۇڬۈ.

هانجې سارداراص بۇيرۇڅ ۺۇلاڸۇل ڬۈحدې ڨۇنا،

ۺێبڬۈ تۇن،  هېب باڅێزې حۇكمۇ هابۇن گاڸانا.

ڬۈحدا بۇگاراب صانڬار راڅ - راڅالدېڬێ ۺۇۺان،

شامێلێل مۇرێدزابێ،  غۇرۇن،  طاطالا ڭانا.

ۺۇنۇسێڶان رۇگارال مالاچێل چۇقبۇزۇلڬێ،

جێوڬۈڬێ هۈرڨۈو رێڴۇن،  انڨڬۈ چێياصدې ڭانا.

ئێماماصۇل راڅاڶان طادې كۇمېك ۺوېڃېڷۇل،

مالاچێڛا انڨاوڬۈ شامێلێڅې وێطانا.

جێندێر ݭۈنێڬێياو واس ناڅې خۇطۇن واتانێ،

جێندێرڬۈ سايغاتێلان،  څێرێمڬێ بێطۇن انا.

جێوڬۈ مالاچێ وۇڬۈ ڬۈحێل ڬانڃێدا ناڅا،

باڅۇن څاتێڨ خوالچېنڬۇن،  غازاواتاڷې قاڃان.

جێنداصا باطاڸاراب غېجاڷۇل ئۇرغېل هېڃۈ،

چېرخالدا طاد ڸۇن رۇڬېل رۇغنازۇل حێساب ڬۇرۈ.

حاسراڸێ بېرهۇن بۇڬۈ كافۇرزابێ غۇرێزې،

باڞاداب غازاواتڬۇن،  ڬۈحدا شاهێدڸۇن ځوېزې.

ښێنڬێ كافۇرزابازۇل كۇتاكاب رۈخېل بۇڬۈ،

كوېر بازې گۈلارېب ڬۈح ۺوانێن كۈدۈبې ابۇن.

ڬۈحێل طۈهێب عۇج بازې عېدېعۇلېل رۇڬۈ ال،

هېنێب غارادۇي ڄاراب غالباڝڬێ ڸالارۈڬۈ.

طۈڛېوې طادې ۺواراو ڸابڬۈ مۇنافێقاصۇل،

ڬۈربۈڶ باراب خوالچاڛا،  بۇطرۇل راڨدې رۈرتانا.

خادۇو طادې گانڝاراو ۺۇڬۈياصدا رۇغنال ڸۇن،

هېزۇل ښۈ ئێمانهېڃېص مالاچێدا ڝا ڸۇنا.

كێسما طادې ۺوارابڬۈ،  ڝا هالاڬڸۇن ڶۇهانا،

ڝادۇل حال بېرهێنېعان،  خوالچېن اسڬێ ڄۇن تېڃۈ.

ڝاياڷ وۇحۇن ځوېزېعان،  خوالچادۇل عۈرڨ بێڿاڃېو،

الجاناڷۇل تاخێدا تاڬې لاچېن مالاچێ.

عاشێلطاصا مالاچێ،  بێلالێل واس مۇحاماد،

خێرێياصۇل  عالێبېڬ،  عۇرگاڃێصا مۇرتازا،

صۇغراڶا قۈقاو عۇمار،  خاراڮێصا عالێخان،

هېلڬۇن ښاداڅ راغارال كێنالڬۈ مۇرێدزابێ.

صانڬاراڷۇڅ رۇگارال طۈلالڬۈ غازێزابێ

شافاعات كامۇن تۈڬې،  حاجێياصۇل مۇحاماد.

ۺۇلاڸۇل ڬۈحدا ڭاراب مۇرێدزاباز بێښێندال،

شامێل ئێماماصۇلڬێ كېرېن ئۇرغالێل ڝۇنا.

جێندێر مۇغڃوارال لۇچنۇل شاهێدڸێ بايانڸێدال،

ئۇهۇن،  حۇڮېلڬێ بێڿان،  ڬانڃێدا طاد گۇسانا.

هېب خابار طادې ۺوېدال،  عۈدۇلېل رۇڿابازۇل

بۇحاراب كارانزۇڶان هارۇن تۈلېل ماعاباز،

عۇمرۇياڷ مۇغ رېخێڃېل خارابازۇل  قۈقابێ

قاڃان ڄانا راغێزې،  غازاواتالدې ئێنې.

هېزۇل بېرازۇل نۇرال - ڸێمالازۇل ڸێمالښێن،

ڛێدال ڝۇرال راگالڬۇن،  راڅانا غۈرڶ جۇرازې.

رۈسال ڃوارال ڷۇدبێڬێ،  واڛال ڃوارال ياڛالڬێ،

واسال كامۇرال ئۇلبۇل،  ئېمېن ځوارال بېصدالال.

ئۈه،  فاقێرازۇل ئۇهدێ،  ابۇن تۈلېل راعابێ،

ۺوارازۇل ياراغ بۈرچۇن،  راغێزې قاڃادۇلېل.

قۇوات داهڸۇن ڭانێڬێ،  حال ڸازې بێڿالارېل،

حۇرۇلعێنزابێ رۇڬۈ حال ڸازې بێڿالارېل.

بادرۇ،  ئۇحۇدالداڬێ ئېدێناب راغ كێب ڭۈلېب،

بالاهارال حايرانڸۇن،  عاقلۇيالداصا ئۇنېل.

هانجې ئێمامۇل اعزام ماجڬێتاڷۇوې انا،

كێنالڬۈ مۇرێدزابێ هېنێرې داندېڸانا.

طادې ۺواراب زاحماڸێ كێنازداڬۈ بێښانا،

هابێزې ڭۈلېب راغۇل بايان كۈدۈبې ڨۇنا.

طۈگاب هابێزې گۈلېب ۺێبڬۈ جۈڬێ هېڃېڸۇل،

اخێرێياب رۇح ڨېزې حادۇرڸېيان ابۇنا.

شۇلاڸۇل ڬۈح كافۇراز كۈدۈبې بۈسۇن بۇڬۈ،

كواراناب غېج هېڃېلڸۇن نێڶـڬێ خۇطۇلېل رۇڬۈ.

ښێنڬێ سارداراصۇل ڬۇچ احۇل ڬۈحالدې انا، 

رێڴېن قۈساراب سالدات طادې باڃۇنېب بۇڬۈ.

راغۇيې هۇنار بۇڬېل ۺۇلاڸابێ ڭۇن ڄېلا، 

چۈرخۈل چارا ځوېزېعان،  مالعۇنازې چۇچۇڬې.

ڃاڬۈيال كوېردې ئۇنڬې،  چۈرخۈڶا رۇح ئێنېعان، 

ئېز ئێنجێت هارێزېعان،  غازاواتالدا ځۇن ڷێگ.

هېدێناب احوال - حالاڷ،  حال داهڸاراب قۇواتڬێن، 

قاڃان رۇڬۈ مۇرێدال اخێرێصېب رۇح ڨېزې.

بۇخۇلېب قۈلۈل دوارغێ،  قواقوالېب زۇرمێل هارڨال، 

طادې باڃۇنېب بۇڬۈ حێساب ڸالارېب اسكار.

خوالچادۇل چافێ بۇڬۈ،  خۇچدۇزۇل تۇنكێ بۇڬۈ، 

خانجار باڅۇن ڨابېلېل لېبالال واسال،  ياسال.

لائێلاهان هال رۇڬۈ،  هۇرايان ښۈيال رۇڬۈ، 

غۇرۇن باراب خالقاڷۇل ئۇهدێ - زێڬارا بۇڬۈ.

ڝادال ران،  ئێخال ۺوېڃېل احۇل ڬۈحاڷۇل ڬۈنڬاڷ

ڷۇقارال عادامازۇل بێدۇل حۈرال رێڮۇلا.

هېل قۈياز ڬۈح بێڮارال ڷاوۇداصا ئێنائان، 

هېڷۇل حێساب هابۇرال،  هاڬڸۇن،  عۈدۈر ڭېلائان.

هانێر ڬۈحدا ځوارازۇل،  خێيالال رېگېڶـڬێ قان، 

قان ڄۈلارېب چۇ عادێن،  ئێمام شامێلڬێ وۇڬۈ.

ښێنڬێ بۇيۇرۇڅ بۇڬۈ،  احۇل ڬۈحڬێ رېخۇن تۇن، 

ڃاڬۈ رۇڬېل ۺێناڛا قواطێبې نۇځ باڅێزې.

داندې واڃاراو مالعۇن،  بېطېر قۈطۇن رېخۇلا، 

ڛېوې ڶۇهاراو فاسێق،  چېڮ بێڅۇن،  عۈدۈو ڸۈلا.

هېدێناب حێسابالدا ئێمام قواطێو وۈرڃۇلا، 

خۇطارال  مۇرێدالڬۇن  چاچانڸێيالدې ئۇنا.

واغۇن ڷۇقاراو واسڬۇن،  رۇغنازۇل ڝۇراب چېرخڬۇن، 

ڬۈح تۈلېب ساعاتالدا ئێمام ناڅ والاهانا.

باركالا،  نۇجېي ڬۈحال،  ڬۈح ڝۇرال غازێزابێ، 

باركالا،  عېشدېرێل راڨ - ئێماماصۇل  ئێستانبۇل.

قۈ - مېخ ڷێگ نۇجېي هانجې،  تارالێن نۇج نێجېڛا، 

ڛێدال ڝۇرال راگالڬۇن،  رۈڞۈل ڝۇرال رۇغنالڬۇن.

هېدێن ڶۇعانا قێصا ماشهۇراب احۇل ڬۈحێل، 

ئېڷۇل تارێخ څوالېزې،  تانا ناڅېڬێ خابار.

АХIУЛ ГОХIИЛ КЪИССА

Ххалкъияб кечI

Рагъул къуват дагьлъидал, росаби чучун ккедал,

Чара хварав имамасс ГIашилтIе нух бахъана.

Рагъул таваккал бугеб, гъазаваталълъул агьлу,

ГIешдерил жамагIатгун, гIакълу дандбазе ана.

ХIалбихьарал муридал, ццебехъанаб жамагIат -  

Имамассул вагIзаялълъ асир гьарун рукIана.

АхIул гохI щула кквелин Шамил имам кIалъана,

Щулальул гохIда чIчIелин, Малачиги вахъана.

КIиябго гохI цIунизе муридзаби рикьана,

Малачил къапиладулI шунусгогIан чи ккана.

Шамилил муридзаби азарилIан рукIана,

ЧIчIужу, лъималгин херал, нух гьечIеб гохIде ана.

Имам рагъухъабигун АхIул гохIде вахана,

Рагъуй хIадурлъун ругел щулалъаби рихьана.

Щибаб щулалъиялде рекъон кколел тIамуна,

ГIешдерил гохI цIунизе анцIго мурид витIана.

Кинабго хIалтIи тIубан, хIалхьи черххалълъе гьабун,

ГохIил тIогьивги вахун, имам гIодовчIчIун вуго.

Киналго муридзаби,  ссверун имамги ккун,

Гъазават гьабилилан, гьедун, кIалъалел руго.

БахIарчилъи камилаб кинабго гьалмагълъигун

ГIамирханил Малачи борххалъуде вахана.

Гьединаб хIисабалда гохIал щула гьаруна,

Рахъ-рахъалдасан рачIун, капураз ссверун ккуна.

Шамилил мурид рикIкIун, анцIго-къого чи кколеб

Къуватги цадахъ бачун, сардар ГIашилтIе щвана.

Щибго зарар ккечIого, Шамил кверде восилин,

Гьаб бакIалдаго рагъул аххир букIине бугин.

РекIелI паххрулъиги ккун, щулияб нигаталда

Рагъда гъорлIе лIугьине амраби кьолев вуго.

Кинабго рахъалдассан рагъизе байбихьана,

Рагъул аят рещтIарал ссонгрода нахъа чIчIана.

Дагьалго муридзаби берзуего гIечIого,  

ГIурусазул камандир кеп щун, велъулев вуго.

Воре, малгIун, велъуге, нахъа гIодизе ккелин,

ГIиял рехъабаздасса хъумур хIинкъуларебин.

Салдат гIемераб бугин, мун элдасса чIухIуге,

ЧIван гIодоре эл райдал, ххадув гIодизе гурин.

Бачунеб накъирагун, буххулаго къалигун,

ГIурусазул капила гохI-щобазда щущана.

АхIул гохIде рахунел гIурусазул салдатал,

Шамилил чи хвечIого, гъурун кIкIалахъе рана.

Щулалъул гохIде араб генералассул полкги,

ХIал ссварал гIиял гIадин, гохIил бакъда щапана.

Гъурун гIодор ран ругел рагъухъаби рихьидал,

Сардар гьагав чи гIадин, ссверданхъизе лIугьана.

Гьеб хIисабалда вагъун, бергьунареблъи лъайдал,

Кинавниги камандир данде ахIун, кIалъана:

Генералассул амру тIубазе кколин абун,

Киналго нусилбутIруз тIадебоси гьабуна.

КIиго моцIцIалълъ рагъидал, Шамилил муридазул

Капурзабаз гъурарал дагьал чагIи рукIана.

Шамилил муридзабаз генералассул салдат,

РекIей бокьухъе гъурун, щобал, кIкIалал цIун руго.

Гьанже сардарасс буйрухъ Щулалъул гохIде кьуна,

Щибго тун, гьеб бахъизе хIукму гьабун кIалъана.

ГохIда букIараб ссангар рахъ-рахъалдеги щущан,

Шамилил муридзаби, гъурун, тIатIала ккана.

ЩунусилIан рукIарал Малачил чукъбузулги,

Живгоги гьоркьов рикIкIун, анкьго чияссде ккана.

Имамассул рахъалIан тIаде кумек щвечIелълъул,

Малачицца анкьавго Шамилихъе витIана.

Жиндир цонигияв вас нахъе ххутIун ватани,

Жиндирго сайгъатилан, хъиримги битIун ана.

Живго Малачи вуго гохIил ганчIида нахъа,

Бахъун хъатикь ххвалченгун, гъазаваталълъе къачIан.

Жиндасса батIалъараб гъежалълъул ургъел гьечIо,

Черххалда тIад лъун ругел ругъназул хIисаб гуро.

ХIасралъи бергьун буго капурзаби гъуризе,

БацIцIадаб гъазаватгун, гохIда шагьидлъун хвезе.

Цинги капурзабазул кутакаб роххел буго,

Квер базе кIолареб гохI щванин кодобе абун.

ГохIил тIогьиб гIуж базе гIедегIулел руго ал,

Гьениб гъарадуй чIчIараб гъалбацIги лъаларого.

ТIоццеве тIаде щварав лъабго мунапикъассул,

ГорболI бараб ххвалчацца, бутIрул ракьде рортана.

Ххадув тIаде кIанцIарав щугояссда ругънал лъун,

Гьезул цо имангьечIасс Малачида цIа лъуна.

Кисма тIаде щварабго, цIа гьалаглъун лIугьана,

ЦIадул хIал бергьинегIан, ххвалчен ассги чIчIун течIо.

ЦIаялълъ вухIун хвезегIан, ххвалчадул гIоркь биччачIев,

Алжаналълъул таххида таге лачен Малачи.

ГIашилтIасса Малачи, Билалил вас МухIамад,

Ххирияссул  ГIалибег, ГIуркIачIисса Муртаза,

СсугъралIа кьокьав ГIумар, Ххарахьисса ГIалихан,

Гьелгун цадахъ рагъарал киналго муридзаби.

Ссангаралълъухъ рукIарал тIолалго гъазизаби

ШапагIат камун тоге, ХIажияссул МухIамад.

Щулалъул гохIда ккараб муридзабаз бициндал,

Шамил имамассулги керен ургъалил цIуна.

Жиндир мугъчIварал лучнул шагьидлъи баянлъидал,

Угьун, хIухьелги биччан, ганчIида тIад кIусана.

Гьеб ххабар тIаде щведал, гIодулел руччабазул

БухIараб каранзулIан гьарун толел магIабаз,

ГIумруялълъ мугъ реххичIел ххарабазул  къокъаби

КъачIан чIчIана рагъизе, гъазаваталде ине.

Гьезул беразул нурал - лъималазул лъималцин,

Ццидал цIурал ракIалгун, рахъана гъорлI журазе.

Росал чIварал лълъудбиги, ваццал чIварал яццалги,

Васал камурал улбул, эмен хварал бессдалал.

Огь, пакъиразул угьди, абун толел рагIаби,

Щваразул ярагъ борчун, рагъизе къачIадулел.

Къуват дагьлъун кканиги, хIал лъазе биччаларел,

ХIурулгIинзаби руго хIал лъазе биччаларел.

Бадру, УхIудалдаги эдинаб рагъ киб кколеб,

Балагьарал хIайранлъун, гIакълуялдасса унел.

Гьанже имамулагIзам мажгиталълъуве ана,

Киналго муридзаби гьенире данделъана.

ТIаде щвараб захIмалъи киназдаго бицана,

Гьабизе кколеб рагъул баян кодобе кьуна.

ТIокIаб гьабизе кIолеб щибго жоги гьечIелъул,

Аххирияб рухI кьезе хIадурлъеян абуна.

Щулалъул гохI капураз кодобе босун буго,

Кваранаб гъеж гьечIеллъун нилIги ххутIулел руго.

Цинги сардарассул гуч АхIул гохIалде ана,

РикIкIен къосараб салдат тIаде бачIунеб буго.

Рагъуе гьунар бугел щулалъаби ккун чIчIела,

Чорххол чара хвезегIан, малгIуназе чучуге.

ЧIагоял кверде унге, чорххолIа рухI инегIан,

Эз инжит гьаризегIан, гъазаваталда хун лълъикI.

Гьединаб ахIвал-хIалалълъ, хIал дагьлъараб къуватгин,

КъачIан руго муридал аххириссеб рухI кьезе.

Бухулеб къолол дваргъи, къвакъвалеб зурмил гьаркьал,

ТIаде бачIунеб буго хIисаб лъалареб аскар.

Ххвалчадул чапи буго, ххучдузул тунки буго,

Хханжар бахъун кьабелел лебалал васал, ясал.

Лаиллагьан гьал руго, гьураян цоял руго,

Гъурун бараб ххалкъалълъул угьди-зигара буго.

ЦIцIадал ран, иххал щвечIел АхIул гохIалълъул гонгалълъ

Лълъукъарал гIадамазул бидул хIорал рихьула.

Гьел къояз гохI бихьарал лъавудасса инаан,

Гьелълъул хIисаб гьабурал, гьаглъун, гIодор ккелаан.

Гьанир гохIда хваразул, ххиялал рекIелIги къан,

Къан чIчIолареб чу гIадин, имам Шамилги вуго.

Цинги буюрухъ буго, АхIул гохIги реххун тун,

ЧIаго ругел щинацца къватIибе нух бахъизе.

Данде вачIарав малгIун, бетIер къотIун реххула,

Ццеве лIугьарав пасикъ, чехь бихъун, гIодов лъола.

Гьединаб хIисабалда имам къватIив ворчIула,

ХхутIарал  муридалгун  Чачанлъиялде уна.

Вагъун лълъукъарав васгун, ругъназул цIураб черххгун,

ГохI толеб сагIаталда имам нахъ валагьана.

Баркала, нужей гохIал, гохI цIурал гъазизаби,

Баркала, гIешдерил ракь - имамассул  Истанбул.

Къо-мехх лълъикI нужей гьанже, таралин нуж нижецца,

Ццидал цIурал ракIалгун, роцIцIол цIурал ругъналгун.

Гьедин лIугIана къисса машгьураб АхIул гохIил,

Элълъул тарихх хъвалезе, тана нахъеги ххабар.