ۺاي كانطۇلارېو؟ ЩАЙ КАНТIУЛАРЕВ?

٢٠١٦ سۈناڷۇل قۈبۇحێڶ مۈڞاڷۇل ٩ قۈ،  تالات قۈ - خادۇر قۈ

ۺاي كانطۇلارېو؟

ئێنخۈصا عالێحاجێ.

هانجې دێرڬۈ نافساڷۇل حێساب هابۇن بێڮێدال، 

بۇصۇرمان وۇگێن ڬۇرېب،  گۇدێياب دێنڬۈ هېڃۈ.

هابۇلېب عامالاڷۇل،  عېنېڭۇن خال هابێدال، 

ځوېزې وێجاراوێلان راگالدې ڭۈلېب هېڃۈ.

خالقالدا بێڮێڃۈڬۈ باڸڬۈ كوېشڸێ هابێزې، 

الاهاصداصا حێنقۇن،  ناڅې قالېب جۈ هېڃۈ.

قاصێ - قاد ڨێجۇلارېل حافاساتال ڸاڃۈڬۈ، 

حاقاب تۇن،  باطۇلالدې طامۇن وۇڬۈ تۇشماناڷ.

تې،  مێسكێن،  دۇڛا جالڬۈ دۇنيالاڷۇل خێوالال،

خايێر هېڃېب داراناڷ دۇر بازار ڞێڴێنارۈ.

ڝۇنې عازابازداصا عامال هېڃېب قارقالا، 

قۇدراتاو الاه ڬۇرېو اخێر دۇڅې ۺۈلارێن.

ۺاي فێكرۇ هابۇلارېب فاناڸۇلېب رۇقاڷۇل، 

قوالال هېڃېب ڬۇردېيێن دۇدا رېطێنې بۇڬېب.

بېرښێنڬۈ خال هابېيا ځوارال ئېبېل - ئێنصۇدې، 

ئېزۇل نۇځطا ئێنڃۈڬۈ مۇن ڃاڬۈ خۇطۇلارێن.

ځوالێل اهوالازۇلنێ ئۇرغېل دۇدا ڃوالارێن، 

مۇن انێو تېلێن ابۇن،  اياتێۺ دۇڅې ۺواراب؟

دۇدې ۺواراب ئێرڬاياڷ ئێنسان ځاباڶ ڸېلارێن، 

ڸاي - عاقلۇ باتانانێ،  قاڃازې عامال هابې.

بېطېر ئۇنتێ حېڮېزې حال گۈلارېو حالێڮات،

جۇجاحاڷۇل طێنالدې طامۇنێ كێن وۇگێنېو؟

طێفا - ناڞاڷ حانڃانێ حالادا ڄۈلارېو مۇن، 

ڃاحێيال عانقرابازۇل عازاب كێنداي حېڮېلا؟

ڄۇجۇياڷ ڛېبې ڸۇراب كواندا ڃۇحۇلېو مێسكێن، 

كوانازې زاقۇم ڨۇنێ،  قۇلڃێزې كێنداي گوېلا؟

دۇڛا ناڅې تانانێ تۇشماناص بۈسۇن ئۇنېب، 

بۈڞۇل ئۇرغېلڬێ هابۇن،  اخێرات ۺاي گۈچۈنېب؟

ځاباڶې ښاداڅ ڸۈلېب بېرښێناب عامالاڷې، 

عێزرائێل واڃێنالدې قاڃازې عامال هابې.

داهالداصا رازێڸې،  رېڛ الاهاصې هابې، 

بالاه ۺواراو وێڮانێ،  ۺۇكرۇيێلانڬێ ابې.

بۈڞێ ڨېيان هارۇڬې،  هېڷ مۇن فاسات هاوۇلا، 

هۇئێناب طاعاتاڷې تاوفێق عېمېراب هارې.

عێبادات تۇن باطێياب بۈڞێ طالاب هابۇڬې، 

باطۇلاب نۇځاڷ ڮوادۇن ڮۇل ڸۇن ۺێناب ۺوېلارۈ.

هاواڬۇن واساندۇڬې،  ئێلبێس بۈخێزابۇڬې،

خێرێياو حابێباصۇل حاقاب شاهرا ڭۇن وێڷا.

وۈرې،  عاصێياصۇلڬۇن هۇدۇلڸێ دۇڛا ڭۈڬې، 

هېصۇل عامالڬێ بێقۇن مۇنڬۈ ڞۈهۈر ڶۇنېوێن.

ڞالاراو،  واراع بۇڬېو عادان تۇشمانڸۇن ڭۈڬې، 

شايطاناڷۇل هالماغڸۇن طادې واڅێنې ڬۇرێن.

طارێقات كامێلاصدا كوېشاب راعێ ابۇڬې، 

الاهاصې دێن هابۇن،  بېرهارال واسال رۇڬێن.

خالقاڷ ڝاقاوێن ابۇن،  وۈرېڬێ مۇن ڬۇڭۇڬې، 

ڝاقاو،  قاداراو ڸالېو ښۈ قۈ ڬۇرۈنێ هېڃێن.

هۇدۇل - هالماغ وۇڬێلان راگاڷۇل جۈ بێښۇنڬې، 

دۇر ښابزاڛا ڭوېڃېب جۈ چێيار گۇطبۇز ڭۈلارێن.

رۈڨۇقاو داندې ڭانێ،  هۇمېر بێطۇن ڬارڬادې، 

هېصۇل راگالدا بۇڬېب ڸاڃۈڬۈ خۇطۇلارێن.

بېطېرهاناصې ڬۇرېب حېلۇن راعێ ابۇڬې، 

هېصداصا حێنقاراو چێ خالقالداصا بېرهۇنێن.

غێبات - بۇهتان چۈرۈكاب چێياصدېخۇن هابۇڬې، 

چېڮاڷۇل ئېبېلالدا تۇمانگ رېڄێ هېب بۇڬۈ.

گۇدێياب راڸاداڷۇل راعالدې مۇن ۺۇن وۇڬێن، 

رېگێنې ڬاماياڷۇل طالاب كێن هابۇلارېب؟

طاصان راځۇنېب صێراط راسالداصا طېرېناب، 

طاصان وۈرجێنې كۇرڨبال كێن دۇداڬۈ غۈلارېل؟

غافلاتالدا واڃاراو ښۈ حالالدا تۈلارېب

لاحتۇياڷۇو هۇدۇلڸۇن هۇدۇل كێن قاڃالارېو؟

قادې كوېن بۈسێڃۈڬۈ مۇسافێر واڅۇنارۈ، 

سافار ڃالعاراب بۇڬێن،  ڃۈوۈڬۈ ۺايداي ڄۈلېو؟

بېڨێڃۈنێ الاهاص خۇر طادې باڭۇلارۈ، 

طاعاتاڷې ځواراصدا قۈ ڷێگاب بێڮۇلارۈ.

2016 соналълъул къобухIилI моцIцIалълъул 9 къо, талат къо - ххадур къо

ЩАЙ КАНТIУЛАРЕВ?

Инххосса ГIали-хIажи.

Гьанже дирго напсалълъул хIисаб гьабун бихьидал,

Буссурман вукIин гуреб, кIудияб динго гьечIо.

Гьабулеб гIамалалълъул, гIенеккун ххал гьабидал,

Хвезе вижаравилан ракIалде кколеб гьечIо.

Ххалкъалда бихьичIого балъго квешлъи гьабизе,

Аллагьассдасса хIинкъун, нахъе къалеб жо гьечIо.

Къасси-къад кьижуларел хIапасатал лъачIого,

ХIакъаб тун, батIулалде тIамун вуго тушманалълъ.

Те, мискин, дуцца жалго дунялалълъул ххивалал,

Ххайир гьечIеб дараналълъ дур базар цIцIикIкIинаро.

ЦIуне гIазабаздасса гIамал гьечIеб къаркъала,

Къудратав Аллагь гурев аххир духъе щоларин.

Щай пикру гьабулареб паналъулеб рукъалълъул,

Къвалал гьечIеб гурдейин дуда ретIине бугеб.

Берцинго ххал гьабея хварал эбел-инссуде,

Эзул нухтIа инчIого мун чIаго ххутIуларин.

Хвалил агьвалазулни ургъел дуда чIваларин,

Мун анив телин абун, аятищ духъе щвараб?

Дуде щвараб иргаялълъ инсан хабалI лъеларин,

Лъай-гIакълу батанани, къачIазе гIамал гьабе.

БетIер унти хIехьезе хIал кIоларев хIалихьат,

ЖужахIалълъул тIиналде тIамуни кин вукIинев?

ТIипа-нацIцIалълъ хIанчIани хIалада чIчIоларев мун,

ЧIахIиял гIанкърабазул гIазаб киндай хIехьела?

ЧIчIужуялълъ ццебе лъураб кванда чIухIулев мискин,

Кваназе закъум кьуни, къулчIизе киндай кIвела?

Дуцца нахъе танани тушманасс босун унеб,

БоцIцIул ургъелги гьабун, аххират щай кIочонеб?

ХабалIе цадахъ лъолеб берцинаб гIамалалълъе,

ГIизраил вачIиналде къачIазе гIамал гьабе.

Дагьалдасса разилъе, рецц Аллагьассе гьабе,

Балагь щварав вихьани, щукруйиланги абе.

БоцIцIи кьеян гьаруге, гьелълъ мун пасат гьавула,

Гьуинаб тIагIаталълъе тавпикъ гIемераб гьаре.

ГIибадат тун батIияб боцIцIи тIалаб гьабуге,

БатIулаб нухалълъ хьвадун хьул лъун щинаб щвеларо.

Гьавагун васандуге, илбис боххизабуге,

Ххирияв хIабибассул хIакъаб шагьра ккун вилълъа.

Воре, гIассияссулгун гьудуллъи дуцца ккоге,

Гьессул гIамалги бикъун мунго цIцIогьор лълъуневин.

ЦIцIаларав, варагI бугев гIадан тушманлъун ккоге,

ЩайтIаналълъул гьалмагълъун тIаде вахъине гурин.

ТIарикъат камилассда квешаб рагIи абуге,

Аллагьассе дин гьабун, бергьарал васал ругин.

Ххалкъалълъ цIакъавин абун, вореги мун гуккуге,

ЦIакъав, къадарав лъалев цо къо гурони гьечIин.

Гьудул-гьалмагъ вугилан ракIалълъул жо бицунге,

Дур цабзацца кквечIеб жо чияр кIутIбуз кколарин.

Рокьукъав данде ккани, гьумер битIун гаргаде,

Гьессул ракIалда бугеб лъачIого ххутIуларин.

БетIергьанассе гуреб хIелун рагIи абуге,

Гьессдасса хIинкъарав чи ххалкъалдасса бергьунин.

Гъибат-бугьтан чорокаб чияссдеххун гьабуге,

Чехьалълъул эбелалда туманкI речIчIи гьеб буго.

КIудияб ралъадалълъул рагIалде мун щун вугин,

РекIине гамаялълъул тIалаб кин гьабулареб?

ТIассан рахунеб ссиратI расалдасса тIеренаб,

ТIассан воржине куркьбал кин дудаго гъоларел?

Гъаплаталда вачIарав цо хIалалда толареб

ЛахIтуялълъув гьудуллъун гьудул кин къачIаларев?

Къаде квен босичIого мусапир вахъунаро,

Сапар чIалгIараб бугин, чIового щайдай чIчIолев?

БекьичIони Аллагьасс хур тIаде баккуларо,

ТIагIаталълъе хварассда къо лълъикIаб бихьуларо.