ئېبېلاڷۇل ياساڷې واسێڬات ЭБЕЛАЛЪЛЪУЛ ЯСАЛЪЛЪЕ ВАСИГАТ

ئېبېلاڷۇل ياساڷې واسێڬات

وۈرې كێدانێڬێ كاك تۈڬې،  دارمان،

كاك تاراب چېرخالدا باركات ڸۈلارۈ.

كێب حېطې ڸۇنێڬێ،  ڸان بۇگا دۇدا،

الاه دۇدا خادۇب خال ڭۇن وۇڬېبڸێ.

ئېبېلاڷ ڸۇراب ڞار ڝۇنې،  دێر مېسېد،

عادامازۇڶ دۇرڬۈ قادرۇ بۇگێنې.

ڃۇحێ،  فاخرۇڸێڬۇن ڮوادۇڬې،  دێر ياس،

دۇداڬۈ خادۇب گال رېگۇنڬۇطێزې.

عۈلۈڅانڸێياڷۇل غوېط دۇڛا ڝۇنې،

هېب،  عارڨېل بېكانێ،  كوېشڬۈ بێجۇلا.

حېطې ڄېزې تۈڬې دۇرڬۈ طېهالدا،

طاد مال ڄاراب طۈهۈل بېرښێنڸێ ځۈلا.

راگاڷۇل باڞاڸێ ڝۇنې،  ياس،  دۇڛا،

الاهاص ڝۇنێلا راگ باڞاداو چێ.

ڝۇنې دۇڛا دۇرڬۈ رېگېل حېرېنڸێ،

هېڷ ڛێدال كاراچېل قېزې هابۇلا.

وۈرې،  دۇڛا خېخڸۇن راعێ ابۇڬې،

ابێڃۈڬۈ تاراب راعێيێن ڝاقاب.

دۇي چۇچۇلارېصې كېرېن چۇچۇڬې،

كێنابڬۈ هېب مېتېر قۈطنۈب باتۇلا.

ڞۈرۈل عانسێ عادێن عۇنۇن يێگۇنڬې،

ځێنڸێيێن بۈڨۇلېب مۇن يۈڨۇلېزې.

باقواراب طێل عادێن طێلعان يێگۇنڬې،

هېب خېخڬۈ بېكۇلا،  كوېر طادې ښۇنێ.

دۇڛا ئۇرغېل بێڨې مۇن وۈڨۇلېصې،

مۇن قوارێد يێڮانێ،  ئۇرغېل ڃوالېصې.

دۇڛا كېرېن چۇچې مۇن وێڄۇلېصې،

دۇر ئۇرغېل اغازاڷ قۈيال ئۇنېصې.

هۇقاراب باقۇڨ مۇن خێنڸێزې ڃۈڬې،

دۇرڬۈ قاوۇڶ بۇڬېب ڝاڬێ عۇن يێگا.

دۇرڬۈ راهدا باق ڭوې،  رۈقۈب خێنڸێ ڭوې،

مۇن كواچان عۇمرۇياڷ ځوېزې تۈلارۈ.

مۇن ڮوادۇلېب نۇځدې ڛېبې ڮانێڬێ،

عارښۇدې قۇلۇڬې،  قادرۇ بێخۇلا.

قۈطنۈب عۈدۈب باراب مېسېد باتانێ،

كۈدۈبښێن بۈسۇڬې،  مۇن باسراڸۇلا.

بێڮێنچێ وۇڬېڷۇي مۇنڬۈ خۇطۇڬې،

هېنێبې هۈرڨۈبې ئێلبێس باڃۇنا.

رېقېڃېل فێكرابێ كارانڶ هالدېزې،

كوېشڸێياڷۇل نۇځدې ڬالێ بېهۇڬې.

مۇناهال كامۇراو چێ وۇگۇنارۈ،

الاهاصې تاوبۇ تۈڬې كێداڬۈ.

رێقزێ عاطێڸۇلېب،  عۇمرۇ بۈخۇلېب،

عۇجدا بالېب كاكێي هابۇڬې كوالكوال.

چێيار مۇناهازۇل هۈرۈي ياڭۇڬې،

دۇرڬۈ جاواب ڨېزې گواراب عۈلا دۇي.

بێڮاراب،  راعاراب هۇرۺێزې ئۇنڬې،

هېب ڝېخېزې ڬۇرێن باڝ رۈڮۈب ئۇنېب.

جاحدا حۇسۇد دۇڛا دۈبې ناڅې ښۇي،

ښاداڅ هېب بۇڬېو چێ عۇزراباز ڃوالێن.

ماكرۇيالداصا مۇن رێڴادا يێگا.

بالاهاڷ ښۈ قۈياڷ قېزې هايۇلێن.

ڬۇلا بۇصانێڬێ،  طاد بۇصۇنارېب،

صۈعاب راعێ ابۇن،  عادان ڷۇقۇڬې.

قادې باق صوانێڬێ،  صوێنې ڸالارېب،

تۇشمانڸێ راگالدا بېڨێزې تۈڬې.

ياحاڷۇل كۇناڛا ئۇهېن باساراب،

صابرۇياڷې دائێم رێطۇڅاي يێگا.

نامۇساڷۇل ئێڛۇڅ لۇڬبالڬێ چۇرۇن،

چېرخ دۇڛا كێداڬۈ باڞادڬۈ ڝۇنې.

دۇڛا دۇرڬۈ رۈقۈب قادادا بان تې،

اداباڷۇل چێراڅ نۇراڷۇل كانڸێ،

هۈبۈل هۇدۇلاصې هۇمېر بێطێزې،

هېڶ نۈدۈ بۇڴێنې بێڿانڬۇطێزې.

دۇڛا،  وۈرې،  دارمان،  مۇنڬۈ يېڛۇڬې،

عاداماز يېڛێلا،  يېڛێزې ڭانێ.

كوېشاڛا كاكۇنان ئۇرغېل هابۇڬې،

فێڅ هېڃېب غۈطۈدا طێل رېڄۇلارۈ.

ئۇمۇمۇزۇل عۈرڅێ باځۇنېب عاداب،

ڮوادا ڃوادێ دۇڛا،  وۈرې،  هابۇڬې.

عادامال ڮوادۇلېب نۇځڬێ جێبڬۈ تۇن،

زۈدێصان يۈرجێنې كۇرڨبال ئۇرغۇڬې.

عاداماڶ طۈگڸۇڬې،  طۈگڸانۺێنازدې،

طادې حاڞۇ تۇنێن ماعارۇلاڛا.

ڛېيې ڛېيې گانڝۇن،  يێڮێزايۇڬې،

هېدێن ڛېرېطۇرال صۇرۇن رێڮۇلێن.

ياسال عادالڸۇلېل راعابێ ڸالېو،

عۈلێلاص مۇن غۈرڨې رېخێزې ڬۇرێن،

عاقلۇ هاوايالدې بۈرجێنابۇلېل،

هېصۇل راعابازدا بۈجێزې ڬۇرێن.

هال جاقا قۈياڷۇل قۈسارال كۇڃدۇل،

كارانڶې رێڿانێ،  مۇنڬێ قۈسێنا.

چێيار رۈسابازۇڸ رۈڨێ هابۇلېل،

هاڬۇلابێ دۇدا بېرښێن رێڮۇڬې.

دۈز ڷۇدبۇڅا رۈصال راڅێزې ڸۇراب،

ڨۈيالداصان ئۇنڬې،  غۈرڨې رېخۇلا.

ڸێمادۇڅا دادا واڅێزې غۈلېب،

ڬۇدۇر ئێنجێتابڸێ ڸان بۇگا دۇدا.

اصگۈرې قانێښێن عادان قۈسۇنېل،

ياسال عېمېرڸانا داغێستانالدا،

دۇڛا هېزۇلڬۇن بۈخ بۇڮێنې ڬۇرێن،

بېرښێن هېلڬێ رێڮۇن،  ڮوادێزې ڬۇرێن.

ڷێگاب كۈدۈب بۈسۇن،  كوېشاب جێبڬۈ تۇن،

ڛېيېخۇن ئوا،  دارمان،  دۇي نۇځ بێطێلا،

جاقا دۇنێيالڬێ،  دۈب اخێراتڬێ،

مۇن يۈخۇلېب ۺوېلا،  شاكڸۇڬې هېلدا.

زۈبازدا الاهاص قادار څواراصدا،

قانێڨ ياخچانێڬێ،  مۇن داندېڸێلا.

دۇيېيان راڨالدا وێجۇن وۇڬېو چێ،

چافارڸۇن ښۈ قۈياڷ دۇڅې واڃێنا.

ځاباڶې بۈخ ڸۇراي،  ځېراي يێڬێلان،

دێڛا ماڷاراب جۈ دۇڛا رېخۇڬې.

دۇنڬێ،  دۇن عادالڬێ اراب نۇځداصان،

ڛېيېخۇن قۈقێنې دۇي نۇځ بێطاڬێ.

- هالې ۺێباب رۈسۇڶ عاقێلال ئۇلبۇز،

عۇمرۇدۇل دارسالڸۇن تاراب واسێڬات،

ڝۇنارال رېخاراب،  تارال عۈداراب،

عاد هابۇن تاراصۇل تالێح 

بۈساراب.

ЭБЕЛАЛЪЛЪУЛ ЯСАЛЪЛЪЕ ВАСИГАТ

Воре киданиги как тоге, дарман,

Как тараб черххалда баркат лъоларо.

Киб хIетIе лъуниги, лъан букIа дуда,

Аллагь дуда ххадуб ххал ккун вугеблъи.

Эбелалълъ лъураб цIар цIуне, дир месед,

ГIадамазулI дурго къадру букIине.

ЧIухIи, паххрулъигун хьвадуге, дир яс,

Дудаго ххадуб кIал рекIунгутIизе.

ГIолохъанлъиялълъул гъветI дуцца цIуне,

Гьеб гIаркьел бекани квешго бижула.

ХIетIе чIчIезе тоге дурго тIегьалда,

ТIад мал чIчIараб тIогьол берцинлъи хола.

РакIалълъул бацIцIалъи цIуне, яс, дуцца,

Аллагьасс цIунила ракI бацIцIадав чи.

ЦIуне дуцца дурго рекIел хIеренлъи,

Гьелълъ ццидал карачел къезе гьабула.

Воре, дуцца ххеххлъун рагIи абуге,

АбичIого тараб рагIийин цIакъаб.

Дуй чучуларессe керен чучуге,

Кинабго гьеб метер къотIноб батула.

ЦIцIорол гIанси гIадин гIунун йикIунге,

Хинлъийин бокьулеб мун йокьулезе.

Бакъвараб тIил гIадин тIилгIан йикIунге,

Гьеб ххеххго бекула, квер тIаде цуни.

Дуцца ургъел бикье мун вокьулессe,

Мун къварид йихьани, ургъел чIвалессe.

Дуцца керен чуче мун вичIчIулессe,

Дур ургъел-агъазалълъ къоял унессe.

Гьукъараб бакъукь мун хинлъизе чIчIоге,

Дурго къавулI бугеб цIаги гIун йикIа.

Дурго рагьда бакъ ккве, рокъоб хинлъи ккве,

Мун квачан гIумруялълъ хвезе толаро.

Мун хьвадулеб нухде ццебе хьаниги,

ГIарцуде къулуге, къадру биххула.

КъотIноб гIодоб бараб месед батани,

Кодобцин босуге, мун басралъула.

Бихьинчи вугелълъуй мунго ххутIуге,

Гьенибе гьоркьобе илбис бачIуна.

РекъечIел пикраби каранлI гьалдезе,

Квешлъиялълъул нухде гали бегьуге.

Мунагьал камурав чи вукIунаро,

Аллагьассе тавбу тоге кидаго.

Рикъзи гIатIилъулеб, гIумру боххулеб,

ГIужда балеб какий гьабуге квалквал.

Чияр мунагьазул гьорой яккуге,

Дурго жаваб кьезе кIвараб гIола дуй.

Бихьараб, рагIараб гьурщизе унге,

Гьеб цIеххезе гурин бацI рохьоб унеб.

ЖахIда-хIусуд дуцца добе нахъе цуй,

Цадахъ гьеб бугев чи гIузрабаз чIвалин.

Макруялдасса мун рикIкIада йикIа.

Балагьалълъ цо къоялълъ къезе гьаюлин.

Гула буссаниги, тIад буссунареб,

СсогIаб рагIи абун, гIадан лълъукъуге.

Къаде бакъ ссваниги, ссвине лъалареб,

Тушманлъи ракIалда бекьизе тоге.

ЯхIалълъул кунацца угьен басараб,

Ссабруялълъе даим ритIухъай йикIа.

Намусалълъул иццухъ лугбалги чурун,

Черхх дуцца кидаго бацIцIадго цIуне.

Дуцца дурго рокъоб къадада бан те,

Адабалълъул чирахъ нуралълъул канлъи,

Гьобол-гьудулассe гьумер битIизе,

Гьелълъ нодо букIкIине биччангутIизе.

Дуцца, воре, дарман, мунго еццуге,

ГIадамаз еццила, еццизе ккани.

Квешацца какунан ургъел гьабуге,

Пихъ гьечIеб гъотIода тIил речIчIуларо.

Умумузул гIорхъи бахунеб гIадаб,

Хьвада-чIвади дуцца, воре, гьабуге.

ГIадамал хьвадулеб нухги жибго тун,

Зодиссан йоржине куркьбал ургъуге.

ГIадамалI тIокIлъуге, тIокIлъанщиназде,

ТIаде хIацIцIу тунин магIарулацца.

Ццее-ццее кIанцIун, йихьизаюге,

Гьедин ццеретIурал ссурун рихьулин.

Ясал гIадаллъулел рагIаби лъалев,

ГIолиласс мун гъоркье реххизе гурин,

ГIакълу гьаваялде боржинабулел,

Гьессул рагIабазда божизе гурин.

Гьал жакъа къоялълъул къосарал кучIдул,

КаранлIе риччани, мунги къосина.

Чияр росабазулI рокьи гьабулел,

Гьагулаби дуда берцин рихьуге.

Доз лълъудбухъа россал рахъизе лъураб,

Кьоялдассан унге, гъоркье реххула.

Лъимадухъа дада вахъизе гъолеб,

Гудур инжитаблъи лъан букIа дуда.

АсскIоре къаницин гIадан къосунел,

Ясал гIемерлъана Дагъистаналда,

Дуцца гьезулгун бохх бухьине гурин,

Берцин гьелги рихьун, хьвадизе гурин.

ЛълъикIаб кодой босун, квешаб жибго тун,

Ццееххун а, дарман, дуй нух битIила,

Жакъа дуниялги, доб аххиратги,

Мун йоххулеб щвела, щаклъуге гьелда.

Зобазда Аллагьасс къадар хъварассда,

Къаникь яхчаниги, мун данделъила.

Дуеян ракьалда вижун вугев чи,

Чапарлъун цо къоялълъ духъе вачIина.

ХабалIе бохх лъурай, херай йигилан,

Дицца малълъараб жо дуцца реххуге.

Дунги, дун гIадалги араб нухдассан,

Ццееххун къокъине дуй нух битIаги.

- Гьале щибаб росулI гIакъилал улбуз,

ГIумрудул дарсаллъун тараб васигат,

ЦIунарал реххараб, тарал гIодараб,

ГIад гьабун тарассул талихI босараб.