ښۈ رۈسدال راعالدا، كاوۇدال گالطا،
كۈدۈب عانصا ڭۇراو ښۈ ځېراو عاقێل،
عۈدۈوېخۇن قۇلۇن قوارێد، فاشمانڬۈ،
فێكراباڷ عۈدۈو ڄۇن وۇگاراوێلا.
واڃۇن طادې ۺواراو ښۈ سافارچێياص
سالامڬێ ڨۇن هېصدا هێقارابێلا:
- هانێر عۇمرۇ هابۇن رۇڬېل عادامال
ڷێگالێۺ كوېشالێۺ، كێنال رۇڬېلان؟
جاواب هابۇن ځېراص سافارچێياصۇل،
سۇئالالدې داندې سۇئال ڨۇنێلا:
- دۇر رۈسۇڶ عادامال كێنال رۇگارال؟
كوېشالێۺ ياڸۇنێ ڷێگالێۺێلان؟
نۇځلۇلاص بۈطرۈدا كوېر كواۺۇلاڬۈ،
كوېشال رۇگانێلان هابۇلا جاواب.
جێوڬێ وۇڬێن ڷێگال عادامال ڬۇرېب
باگ عۇمرۇ هابێزې بالاهۇلېوان.
بېطېر بۈرخێزابۇن ځېراو عاقێلاص.
عۈلێلاصې جاواب هابۇرابێلا:
- هانێرڬێ عادامال كوېشال رۇڬێلان.
كێرڬۈ دۇدا ڷێگال راتۇلارێلان.
خادۇب ښۈ داهابڬۈ زامالانداصان،
واڃۇن ۺواراوێلا ښۈڬێ سافارچێ.
سالامڬێ ڨۇن خواش- باش هابۇن خادۇصا،
ځېراصدا هېصڬێ هێقارابێلا:
- جێو هاب مۇڅالدېخۇن طۈڛېوې ۺواراو،
ڝێياو هۈبۈل وۇڬێن، هاب مۇڅ ڸالارېو ...
هاب رۈسۇڶ عادامال كێنال رۇڬېل؟ - ان
كوېشالێۺ ياڸۇنێ ڷێگالێۺێلان؟
مېڬېج څاحاو ځېراص مێڅێڶـڬێ هێمۇن،
هېصێيې دۈبڬۈ سۇئال ڨۇنێلا:
- دۇر رۈسۇڶ عادامال كێنال رۇگارال؟
كوېشالێۺ ياڸۇنێ ڷێگالێۺێلان؟
- دێر رۈسۇڶ عادامال ڷێگال رۇگانێن،
ڸۇنێلا كاراندا كوېر هاو عۈلێلاص.
هۇدۇل هالماغڸێڬۇن عاڬا بۈجارال
بۈڨێڃۈڬۈ تېزې ڭانێلان ابۇن.
كۈدۈب ڭۇراب عانصا عۈدۈبڬێ تۇنكۇن،
عۈلێلاصدې وۇصۇن داهاڷـڬێ ڸالڅۇن،
ڷۇڮۇلاڬۈ څاحاب مېڬېجڬۇن ځېراص
نۇځلۇلاصې جاواب هابۇرابێلا:
- هانێرڬێ عادامال ڷێگال رۇڬێلان.
ڸێگڸێ ئۇمۇمۇزۇل ئێرساڷې ۺوارال.
مۇن كێوې ڭانێڬێ، كێب ڸالگ ڸۇنێڬێ،
ڷێگال دۇدا كێرڬۈ راتێزې رۇڬێن.
ځېراصۇل جاوابال راعارالێلا
راهطا عۈدۈو ڄاراو عۈرڅێښۈياصدا.
عاجائێبڸێ هابۇن، اصگۈوې واڃۇن،
اصڬێ گۇدێياصدا هێقارابێلا:
- گێياوڬۈ نۇځلۇلاص دێدا راعاراب،
دۇيې ڨۇراب سۇئال ښۈڬۈ بۇگانێن،
گێياصېڬۈ ڨۇراب باطێ- باطێياب
جاواباڷۇل ماعنا كێناب ڭۈلېبان.
گێيابڬۈ كوېراڷ ڭۇن عۈنصۈدېڬێ ڮوان،
عۈرڅێښۈياصدېخۇن وۇصۇن گۇدێياص
- گێياصېڬۈ هېدێن هابۇراب جێندێر
جاواباڷۇل ماعنا ڭۈلێن ابۇلا:
جێوڬۈ عۇراب باگاڷ باتێڃېب ڷێگڸێ،
باتۇلارۈ هېصدا رێڴاداڬێ - يان.
رېگېڶ ئێمان بۇڬېو ڷێگاو چێياصدا،
چێيار باگالداڬۇ باتۇلێن هېبان.
ساعێد ئۈرداشێلازۇل.
۲۰۲۲ سۈناڷۇل څوېڅارۇڶ مۈڞاڷۇل ۱۴ قۈ.
Комментариев нет:
Отправить комментарий